澳門教區劉偉傑神父慷慨地讓我們轉載他面書的一篇講道詞。
筆者一直十分敬佩劉鐸，他學富五車，字字珠璣，利用靈巧的粵語將天主的道理講得活靈活現。以下是劉神父在 2015年7月3日澳門粵華中學中的講道詞。筆者所加的 重點 及[註釋及少少反省]
粵華中學鮑思高瞻禮
舊陣時啲讀書人呢，總係鍾意寫下啲雋言雅語，而有篇叫「警世賢文」既著作呢，收集左好多教人勤奮上進，鞭策自強之類咁既詩句。咩野「少時不努力，老大徒傷悲」呀，「書到用時方恨少」呀，咩野咩野「學海無涯」等等，係啲你同我歷代莘莘學子，左耳入右耳出，可以直頭話係水過鴨背既經典名句，亦都係呢，歷代老師家長，不厭其煩，想將佢地，由右耳塞返入我地左耳，好似塞北京填鴨，或者係餵法國鵝肝醬咁款，想灌輸番俾我地既呢啲古老格言。成效有幾大，多多小小都睇自己做化，生唔生性，同埋，根本唔係個個胸口有咁多墨水加嘛；天主造人，百花齊放，有啲係文青，書卷氣濃啲；另一啲係工青，鋼水灰水味又重啲，總之各適其適， 行行都出文狀元，武狀元，所以舊時什麼「萬般皆下品，唯有讀書高」啲咁既尊優祟優既心態呢，都咪話埋沒左唔少才華洋溢既細路。不過，過猶不及， 書總要讀，字緊要識，否則既話，人文素養，溝通會意，傳統智慧，都無法子培養傳授落去。因此，普及教育，杜絕失學，係天大既使命，責無旁貸。
上海復旦大學同北平輔仁大學既創校人，馬相伯先生，就曾經咁樣評價，同埋分析鮑思高神父，話佢呢位聖人，本身就係一個失學兼喪父既「雙失」窮人，從細長大，半功半讀，佢勝在體力充沛，襟捱襟餓，悟性高強，文史哲理，入耳成誦，過目不忙，成為左一位神父之後，一心一德，以救濟失學幼童為己任。
不過，講就天下無敵，做起黎呢，就那怕有時有心無力。試問：失學兒童，俯拾皆是，邊度有咁多校舍俾佢地呀？無。邊度黎咁多經費？唔知。搵邊個幫手教？又無人。咩野都無，咁點樣謀求教育普及呀你話？ 原來，鮑思高所謂既謀略，或者策略，並唔係出於自私自愛，滿足自己大展宏圖既意願；而係因為佢民胞物與，愛同胞，真心真意，泛愛眾人；佢愛人，因為佢體會到上蒼造物之心；中國易經有句話：「有天地，然後有萬物」，之但係天地萬物本來都係空虛混沌，正式係本來無一物既，係靠造物主同人類，一齊合作，化育大地眾生，修理整治，咁樣，區區校舍經費師資，以至後來什麼教區、耶穌會、慈幼會、母佑會，諸如此類既辦學機構，就算遍地開花，桃李滿門，相比起天主佈置日月星辰咁既創世工程，簡直係濕濕碎啦。「造物主，心既欲之，何難之有？」 馬相伯校長，因此鐵定，鮑思高唔係一位普通既教育家，而係一位上體天心，下察民情既聖人，因此佢開展既慈善事業，無往不利，如有神助。無左鮑思高，怕且你今日都唔會係粵華讀書；不過無左天主，恐怕我地連抖氣都無得抖。
今日禮儀既德訓篇話：「你若羨慕智慧，就應遵守誡命；在各種困苦中，多多忍耐」[德訓篇1:33; 2:4]，正所謂：「寶劍鋒從磨礪出，梅花香自苦寒來」。真金不怕洪爐火，烏雲亦遮唔住太陽，只要好似聖保祿係第二篇讀經話齋：「係一切事上，以懇求同祈禱，懷著感恩之心」[聖保祿宗徒致斐理伯人書4:6]， 好似福音咁話，變返到好似一個細路仔咁，以天真無邪，坦蕩蕩既心懷，同天主表白心跡既話，自然就能夠獲得超乎想像既平安，好似鮑思高神父咁，行事處世，雖歷風浪，都會無愧於心，雖死猶生。
「敬畏上主，係智慧既開端」[聖詠111:10]，但係要完成人生路，仲需要披荊斬棘，希望大家努力。
＋劉偉傑神父
這講道的最後令我想起劉偉傑神父晉鐸當日他的分享。他跟張心銳神父還年少時真的是坦蕩蕩地向天主表白心跡，要為主獻身成為司鐸。結果天主的確豐厚地賞賜了他們倆。天主對他們的賞賜不單是給他們兩人，而是造福了我們這些教友。
