大家好啊，我叫驢仔，純粹想試吓喺呢度分享一下一啲生活同信仰點滴，希望唔會悶親大家啦，真係多多指教啦～
今日雖然係星期日，又雖然啱啱過咗聖誕節，但驢仔今日都要返工，仲要好早添，通常參加彌撒都要去九龍聖德肋撒參加黃昏六點彌撒。好攰嫁都，不過都可以嘅，驢仔我都算年輕，頂得住頂得住。
今日放咗工，帶住好疲倦嘅肉身，好似行屍走肉咁去搭地鐵。平時我搭巴士嫁，有得喺巴士度瞓嘛又唔使轉車，但鬼叫今日地鐵半價，驢仔呢啲人工咁少嘅廉價勞工，就梗係要為荷包著想啦。
架車喺旺角去太子嘅時候，有個婆婆問企響度嘅哥仔「架車係咪去荃灣嫁？」答咗話係之後，婆婆仍然一臉迷惘，就問「去荃灣咁應該啱，不過要去大圍邊度轉？」嘩，荃灣綫同大圍站大纜都扯唔埋喎，驢仔我就出馬啦，問佢究竟係去荃灣定大圍，婆婆話大圍，咁我咪同佢講「應該就喺旺角轉嘅，過對面就係啦，不過宜家去到太子，我喺度落，我帶你去月台啦！」
只不過，我帶婆婆行落一層去往調景嶺嘅月台嗰陣，佢仍然都係「一舊雲」，我就有啲唔耐煩（事關有啲急去廁所，同埋啱啱瞓醒有啲唔清醒），就問「婆婆，你其實想去邊嫁？」婆婆竟然話「我都唔知啊！」我就當然「吓」咗好大聲，同佢講「咁我幫唔到你個喎」。同佢傾咗一陣之後，我就叫佢問清楚究竟想去邊；原來佢真係要去大圍。
本身驢仔就喺太子落車，再行過去聖德肋撒參加主日嘅，見到咁嘅情況，就醒起慈悲禧年啱啱開始咗，當堂醒晒，真係多謝天主提醒瞓緊教嘅驢仔。前排有個神父講道就提咗（其實成日都聽到嘅）耶穌嘅說話：「幾時你哋為我最小嘅兄弟而做就係為我而做。我餓，你有無俾嘢我食；我渴，你有無俾水我飲；我赤身露體，你有無俾衫我著；我病，你有無照顧我；我坐監，你有無嚟探我？」
喺婆婆嘅迷惘樣上面，驢仔即刻見到驢仔嘅主人 -- 耶穌，仲要係啱啱出世、充滿慈悲嘅耶穌添。嗯，一諗到九龍塘轉車嗰個情境，見到呢個「一舊雲」嘅婆婆，驢仔就決定，帶婆婆去到九龍塘啦，送佢到月台、目送佢上車。
喺短短嘅三個站加一段人山人海嘅步行路程，我同婆婆傾咗唔多偈，驢仔變咗保鑣護住婆婆，費是俾啲「自由行」撞親佢。行緊嘅時候，婆婆就喺度呻：「哎呀，我真係無用啦，乜都唔識……」我就即刻話，唔會呀，唔識唔係無用，個個人都有用嘅。唔過幾步，佢又話：「哎呀，我好慘呀，仔又無孫又無，字又唔識……」我又即刻話，唔會呀，你今日遇到我，唔慘喎。
喺再行多幾步嘅路程入面，婆婆就講咗兩句，都係好多香港老人家嘅問題，個仔結咗婚唔理佢。呢個有仔有新抱有孫嘅婆婆，佢無講晒，但喺車站咁多「自由行」嘅地方，就無謂講呢啲，我又唔知點解醒起我好似有一千零一張嘅卡片喺我個袋度，我二話不說就拎咗出嚟，同佢講：「呢度有我嘅電話，你想嘅時候就打俾我，搵我傾偈啦。」又傾多幾句，婆婆話佢細個好少出街，宜家一個人住喺深水埗，今日係個住喺大埔墟嘅細妹約佢，我問佢「約你食飯飲茶？」佢塊面當堂咪咪嘴甜笑話「佢帶我行街啊！」當下真係，好想再為婆婆做多啲嘢，甚至送埋佢去大圍，不過驢仔真係好攰，又覺得佢會更加唔好意思。
送完婆婆上車，千叮萬囑叫佢一開門就記得問地鐵職員點去廁所（佢同佢細妹嘅集合點），目送完佢離開，驢仔個心好似穿咗個窿咁，覺得自己都無「做人做到底，送佛送到西」，唯一可以做嘅就為佢祈禱。
同太子站相比，個人認為九龍塘去聖德肋撒嘅路程係遠少少，不過驢仔就利用呢段行程，為婆婆唸咗串玫瑰經。今日亦都係聖家主日，同時都為香港好多嘅獨居長者祈禱。
其實，驢仔今日真係無諗過會有咁嘅遭遇，而老老實實，呢啲情況喺香港一啲都唔少見。不過，驢仔我今日最想分享嘅，唔係自己做咗隻「威威驢」，而係想提點大家，只要喺小事情上面多留心，亦都可以發現天主嘅慈悲，亦都可以活出天主嘅慈悲。
諗返轉頭，如果驢仔今日無多問一句婆婆究竟要去邊、無逼婆婆問清楚約咗喺邊，只係stick返自己嘅原定行程，又或者只係同佢講喺邊度轉的話，驢仔係唔會幫到婆婆，甚至唔會有機會派到張咭片俾婆婆，叫佢得閒搵我飲茶傾偈。其實，不論幾細微都好，都可以光榮天主、都可以轉化成祈禱，正所謂「即使執粒塵都可以彰顯到天主嘅光榮」嘛。
仲有，要喺近人開始做起，有個神父講過，「係近人啊，即係身邊嘅家人，好似係自己個啊婆，唔係人哋個啊婆；亦唔係去非洲度做義工，喺自己屋企做起。」呢個提點真係好「應節」；聖家節啊，唔該大家要先好好照顧自己頭家先。
同埋同埋，教宗喺嗰份詔書《慈悲面容》入面教我哋要行神形哀矜，但我哋好多時都會只係著重「形」嗰一方面，就咁做愛德服務就當係，驢仔真係覺得咁樣係錯晒，因為最重要嗰part係我哋要為受惠者祈禱。如果我哋只係做義工，派吓餅探下對方，我哋同非教友無分別個啵。我哋要克己祈禱、為受惠者做埋祈禱先至係做晒成set嘅，如果唔係我哋唔係完全活出天主嘅慈悲。
雖然驢仔返完一日工真係攰到趴咗喺度，不過真係好充實，咁就試吓喺呢度同大家分享一下啦，如果睇得唔係好明請見諒啵，因為驢仔已經進入昏睡狀態。
驢仔
